UK का राजदूत डा. सुरेशचन्द्र चालिसेले दुई कर्मचारी लै बिना सूचना जागिरबाट निकाले !!!!

श्याम लुईंटेल लन्डन - लन्डनस्थित नेपाली दूतावासमा लामो समय देखि कार्यरत स्थानीय दुई कर्मचारी विना सूचना निकालिएका छन् । राजदूत डा. सुरेशचन्द्र चालिसेले रुखो पारामा सूचनै नदिइ ‘तपाईंहरु सोमबारबाट हाजिर नगर्नुस्’ भन्दै कर्मचारीहरु दमन्ता खरेल र सुरेन्द्र भण्डारीलाई निकालेको कर्मचारीको आरोप छ । खरेल र भण्डारी दूतावासमा क्रमशः ५ वर्ष तीन महिना र साँढे ५ वर्ष यता निरन्तर काम गर्ने कर्मचारी हुन् । स्रोतका अनुसार, ति दुई कर्मचारीलाई राजदूत चालिसेले दुई वर्ष अघि पनि ‘कन्ट्रयाक्ट’ नथपिदिने प्रयास गरेका थिए । त्यतिबेला चालिसेले खरेललाई १४ दिन र भण्डारीलाई १० दिन हाजिर गर्न समेत रोकेका थिए । तर, पूर्व प्रधानमन्त्री शेरबहादुर देउवा र पूर्व उपप्रधान एवं परराष्ट्रमन्त्रीको बेग्लाबेग्लै फोनकलले जागिर थमौती भएको थियो । राजदूत चालिसे काँग्रेसकै कोटामा राजदूत भएकाले उनी देउवा र कोइरालाको भनसुन सुन्न वाध्य भएका थिए । ‘कर्मचारीको कामबाट चित्त नबुझे पूर्व सूचना दिनुपर्ने सामान्य नियम समेत मिचेर हामीलाई सोमबारबाट हाजिर गर्न दिइएन’–खरेलले भनिन्–‘राजदूतले मलाई शुक्रवार भेटेर सोमबारबाट तपाईंहरु नआउनुस्, म नेपाल फर्कने बेला मेरा मान्छे छिराउँछु भने ।’ अर्का पीडित कर्मचारी भण्डारीले पुरानो र इमान्दार कर्मचारीलाई थाहै नदिइ निकालेर चालिसेले आफ्नो पागलपन प्रस्तुत गरेको आरोप लगाएका छन् । उता, चालक तिलक थापालाई समेत गाडी लिएर राजदूत चालिसेको पाहुना लिन नगएको बहानामा स्पष्टिकरण सोधी निकाल्न खोजिएको स्रोतको दावी छ । थापाले आफूलाई पाहुना लिन जानु भन्ने कुरा कसैले नभनेको स्पष्टिकरण दिए पनि चालिसेले हटाउन अनेक बखेडा झिकेको कर्मचारीको दावी छ । यस विषयमा सम्पर्क गर्दा राजदूत चालिसेले कसैलाई निकालेको नभई करार स्वत सकिएको प्रतिक्रिया दिए । ‘धेरैजसो आइएलआर नपाइन्जेल दूतावास बस्छन्, पाएपछि आफैं छोड्छन्’, चालिसेले भने, ‘जाने आउने क्रम स्वभाविक हो ।’ राजदूत चालिसे आगामी जनवरीमा चार वर्षे कार्यकाल सकेर फर्कंदैछन् । नेपाल फर्कनुअघि उनले आफ्ना आसेपासेलाई नियुक्ति प्रक्रिया शुरु गर्ने तयारी गरिसकेको दूतावास स्रोतको दावी छ । विभिन्न सरकार परिवर्तन भएपनि सबै दलका नेताहरु रिझाउन सफल चालिसे पछिल्लोपटक भने दूतावास भवन विक्रीको नेतृत्व गरेर विवादमा तानिए । यही कारण एनआरएनए यूकेले उनलाई कुनै पनि सार्वजनिक कार्यक्रममा औपचारिक निम्तो दिएको छैन् । लन्डनस्थित नेपाली दूतावासमा कार्यरत स्थानीय कर्मचारीहरु एकदम न्यूनतम तलव लिएर काम गर्न वाध्य छन् । ‘महिनाको तीनसय पाउण्ड बुझ्ने कर्मचारीसंग पनि खाना वापत ७५ पाउण्ड काटिन्छ, यहाँ काम गर्ने भनेको केवल स्टाटसका लागि मात्र हो’– खरेलले गुनासो पोखिन् ।

Category: News