- भारतको जयनगरबाट बिना चालक जनकपुर अाइपुग्यो रेल

कुनै बेला सुन्दै पत्याउन नसकिने घटना घट्दछन् । विश्वमै दुर्लभ मानिने यस्तै एउटा घटना जनकपुरमा घट्यो । जनकपुर जयनगर चल्ने रेलको एउटा इञ्जिन चालकबिनै जनकपुरर आइपुग्यो । त्यो पनि थोरै हो र २९ किलोमिटर दूरी पार गरेर ।

प्राप्त समाचार अनुसार भारतको जयनगरबाट जनकपुर आउने तयारीमा रहेको जेड ई एन ५ (५३५) नम्बरको डिजल इञ्जिन चालकबिना नै २९ किलोमिटर गुडेर सोमबार अपराह्न जनकपुर आइपुग्यो । बाटोमा पर्ने दुई दर्जनभन्दा बढी पुल, सातवटा रेल्वे स्टेसन तथा आधा दर्जनभन्दा बढी गाउँ पार गर्दै चालकबिना नै रेल यहाँसम्म आइपुगे पनि बाटामा कुनै दुर्घटना भएन ।

प्रायः दिनपिच्छे लिक छाड्ने रेल इन्जन बिना कुनै रोकटोक यहाँसम्म आपुग्नुलाई रेल्वे कर्मचारीहरूमात्र होइन स्थानीयवासी पनि अचम्मको घटना मान्छन् ।

अन्य दिनमा दस किलोमिटर प्रतिघन्टा भन्दा पनि थोरै गतिमा हिँड्ने रेल झन्डै पचास किलोमिटरको गतिमा दौडेको देखेर बाटोभरि हल्ला खल्ला भएको थियो । जयनगरबाट बिना चालक रेल गुडेको खबर एकले अर्कालाई मोबाइलबाट दिन थालेको थिए । रेल इन्जन जनकपुर आपुग्दासम्म रेल्वे स्टेसनमा सयौं स्थानीयवासी भेला भइसकेका थिए ।

धनुषाका प्रमुख जिल्ला अधिकारी वसन्तराज गौतम, प्रहरी उपरीक्षक पुरुषोत्तम कडेल, सशस्त्रका एसपी मदन विष्टसहित ठूलो संख्यामा प्रहरी वल रेल्वे स्टेसन पुगेका थिए । कृष्णाष्टमीको तयारीमा रहेका जनकपुर रेल्वे स्टेसन एरिया युवा क्लबका युवक तथा रेल्वे कर्मचारी गुडी रहेको रेल रोक्न लिकमाथि अवरोधक राखेका थिए ।

प्राप्त जानकारी अनुसार अपराह्न साढे तीन बजे जयनगरबाट जनकपुर आउने रेल सेवाको तयारीमा रहेका चालक रफिक कवारीले इञ्जिनलाई सफा सुग्घर गर्दै गरेको बेला इञ्जिन गुड्न थालेको थियो । एक रेल कर्मीका अनुसार इञ्जिन स्टार्ट गरी कवारी पानी खान तल झरेका बेला एक्कासि तीव्र गतिमा हुइँकिएको थियो ।

जनकपुर स्टेसन मैनेजर मणिराज खतिवडाका अनुसार इञ्जिन अहिले पनि न्युटर गेयरमा छ । न्युटर गेयरमा रहेको गाडी कसरी गुड्यो भन्ने विषयमा भने खतिवडा केही जवाफ दि नसकेको खतिवडढाले मलाई त दैवी घटना लाग्छ भन्ने प्रतिक्रिया दिनुभयो ।

प्रमुख जिल्ला अधिकारी वसन्तराज गौतमले आफूले यस्तो घटना पहिलोपटक देखेको उल्लेख गर्दै रेल चालक रफिक कवारीमाथि अविलम्ब कारबाही गर्न निर्देशन दिएको बताउनुभयो ।