पार्टीभित्र नेतृत्वको खुट्टा तान्ने प्रवृत्ति बढ्यो- प्रचण्ड

८ माघ, काठमाडौं । एकीकृत नेकपा माओवादीका अध्यक्ष पुष्पकमल दाहाल प्रचण्डले आफ्नो पार्टीभित्र अराजकता र गुट हावी भएको भन्दै कठोर र निर्मम आत्मसघंर्ष गर्नु पर्ने प्रस्ताव गर्नु भएको छ । पार्टीको आसन्न महाधिवेशनमा पेश गर्ने आफ्नो राजनीतिक प्रतिवेदनमा प्रचण्डले पार्टीमा देखिएको अराजकता र गुटबन्दीको मुख्य स्रोत व्यक्तिवादी अराजकता भएको बताउनुभएको हो ।

‘आज हाम्रो पार्टीमा देखिने अराजकता, अस्वस्थता र गुटबन्दीको मुख्य स्रोत हामी आफूभित्रै चिन्तन र व्यवहारमा विस्तारै पलाउँदै गएको व्यक्तिवादी अराजकतावाद हो’ प्रतिवेदनमा भनिएको छ-’आफ्नो पद र प्रतिष्ठाका लागि मात्र चिन्ता गर्नु, पार्टीभित्र घुर्की, धम्की र बार्गेनिङ गर्नु, आफ्नो र परिवारको सुरक्षा र सुविधाको ग्यारेन्टी खोज्नु, आफूभन्दा तल नोकरशाही बन्नु तथा आफूभन्दा माथि दलाली गर्नु, आलोचना सहन नसक्नु व्यक्तिवादी अराजकवादका उदाहरण हुन् ।’ गुटहरुको अन्त्य गर्नु पर्नेमा जोड दिँदै प्रचण्डले प्रतिवेदनमा भन्नुभएको छ-’दुश्मनको चौतर्फी घेरावन्दीमा रहेको सर्वहारा वर्गको पार्टीले आफैंभित्र रहेको व्यक्तिवादका विरुद्ध कठोर र निर्मम आत्मसंघर्ष र विचारधारात्मक संघर्ष नगरिकन क्रान्तिका बाँकी कार्यभार पूरा गर्न सम्भव छैन ।’

प्रचण्डले आफ्नो प्रतिवेदनमा एमाओवादीमा कुनै पद्दति नरहेको र गुट स्वार्थ र व्यक्ति स्वार्थले प्रभाव जमाएको उल्लेख गर्नु भएको छ । ‘पार्टीमा संगठनात्मक कुनै पद्दति छैन । व्यक्तिहरु कमिटी मातहत छैनन्, पार्टीका तल्लो कमिटीहरु र माथिल्लो कमिटीबीच सम्वन्ध छैन । न त सर्वसम्मत छ, न बहुमत-अल्पमत नै छ’ प्रतिवेदनमा भनिएको छ- ‘गुट स्वार्थ र व्यक्ति स्वार्थले प्रभाव जमाइरहेको छ । यो कम्युनिष्ट पार्टीको संगठनात्मक सिद्धान्त र विधिको ठाडो उल्लंघन हो । पार्टी निर्माण गर्न गुटको अन्त्य हुनै पर्छ ।’ आलोचनाको स्वतन्त्रता र कामकाजमा एकरुपताको मान्यता नै जनवादी केन्द्रीयताको मर्म भएको भन्दै प्रचण्डले आलोचनाको स्वतन्त्रतालाई अराजकतासम्म तन्काउने र कामकाजको एकरुपतालाई तानाशाहीको अर्थ लगाउने काम अवसरवाद भएको बताउनुभएको छ । पार्टीमा नेतृत्वको अवमूल्यन, बदनाम गर्ने र खुट्टा तान्ने प्रवृत्ति रहेको भन्दै प्रचण्डले नेतृत्वको आलोचना, उसलाई रुपान्तरण गर्न हुनुपर्ने न कि अन्तरध्वंश गर्न होइन भन्नुभएको छ । पार्टी कमिटीहरु अस्तव्यस्त रहेको र जसका कारण कार्यकार्ता परिचालन र जनपरिचालन शून्य जस्तो भएको प्रतिवेदनमा उल्लेख छ । पार्टीमा अनुशासनहीनता बढेको, जनवादी कार्यशैलीबाट विचलित भएको, आर्थिक प्रलोभन र अपारदर्शिता तथा समाजिक विकृति देखिन थालेको भन्दै प्रचण्डले आलोचना गर्नु भएको छ ।

एमाओवादी अध्यक्ष प्रचण्डले आफ्नो प्रतिवेदनमा कार्यकर्ताको संरक्षण र व्यवस्थापनमा गम्भीर समस्या देखिएको स्वीकार गर्नु भएको छ । पूर्वजनमुक्ति सेनालाई अझै पार्टीमा संगठित गर्न नसकिएो भन्दै उहाँले भन्नु भएको छ-’हजारौं जनमुक्ति सेनाका कमाण्डर तथा सदस्यहरु आज पनि कमिटीविहीन र जिम्मेवारीविहीन छन् । यो अवस्था लामो समय राख्नु हुन्न ।’ प्रचण्डले पूर्वजनमुक्ति सेना, बाईसीएल र जनवर्गीग मोचर्चासहिको सहभागितामा फरक स्वरुपमा पार्टीको नेतृत्वमा स्थानीय सत्ता बनाउन प्रस्ताव गर्नु भएको छ ।