फोरम नेताद्वारा आत्महत्या (सुसाइड नोटसहित)

भद्रपुर ।
मधेशी जनाधिकार फोरम मधेशका भातृ सगठनका रुपमा रहेका मधेशी युवा फोरम, मधेशका केन्द्रिय अध्यक्ष कैलाश चौधरीले आत्महत्या गरेका छन् ।
भद्रपुर-८ निवासी ३८ बर्षिय चौधरीले भानुनगरस्थित आफ्नै साइकल पसलमा शनिवार बेलुकी झुण्डिएर आत्महत्या गरेका हुन् । शनिवार दिनभर पसल बन्द रहेपनि बेलुकी साढे ४ बजे पसलको एउटा ढोका खुलेर कोही नभएको मौका छोपी उनले आत्महत्या गरेको जिल्ला प्रहरी कार्यालयले जनाएको छ । प्लाष्टिकको डोरिमा झुण्डिएको अवस्थामा जिउँदै फेला पारिएका चौधरीलाई उपचारका लागि स्थानीय ओम साइ अस्पताल लगिएकोमा उपचारकै क्रममा राति ९ बजेतिर उनको मृत्यु भएको थियो ।
केही दिनदेखि पार्टीको राजनैतिक दवावका परेर मानसिक तनावमा रहेका चौधरीले आफ्नो इमान्दारिता बचाउनलाई आत्महत्या गरेको आफुले लेखेर छाडेर गएको सुसाइड पत्रमा उल्लेख गरिएको पाइएको छ ।
दोस्रो जनआन्दोलनपछि मधेशी पार्टीका क्रियाशील कार्यकर्ताको रुपमा चिनीएका चौधरी पछिल्लो समयमा मधेशी जनाधिकार फोरम मधेशका भाग्यनाथ गुप्ता समूहमा रहेका थिए ।