अवार्ड समारोहमा लुटका निर्देशकले पोखे गुनासो

नेपाली फिल्म उद्योगमा संकटकाल लाग्ने पक्कापक्की भएको अवस्थामा संकटकाल लाग्न बाट जोगाउने फिल्म लुट हो । सबै फिल्महरु धमाधम फ्लप भैरहेको अवस्थामा तत्कालिन समयमा लुटले जादुमय तरिकाले दर्शकहरुलाई हल सम्म ल्याएको थियो । र, पछिल्लो समय सर्वाधिक सफल फिल्मको रुपमा पनि लुट लाई नै लिने गरिन्छ ।

लुट फिल्म चल्ने ताका फिल्म भित्र रहेको संवादहरुले निकै चर्चा कमाएको थियो । अझै धेरैले त  लुट फिल्म चल्नुको मुख्य कारण नै फिल्मका पात्रहरुले बोल्ने संवाद नै भएको दावी गरे । निर्माणपक्षले पनि लुट फिल्म चल्नुको मुख्य कारण संवाद नै भन्ने गर्छन् । तर अचम्म संवादकै कारण सर्वाधिक चर्चा बटुलेको फिल्म लुट छाँयाछवी डिजिटल फिल्म अवार्डमा उत्कृष्ट संवादको नोमिनेशनमा समेत परेन ।

आफ्नो फिल्मको संवाद उत्कृष्ट संवाद अर्न्तगतको नोमिनेशनमा नपरेपछि यो फिल्मका निर्देशक निश्चल बस्नेतले कार्यक्रम स्थलमै गुनासो पोखे । “हाम्रो फिल्ममा सबैभन्दा धेरै चलेको भनेको संवाद नै हो तर अफसोच फिल्ममा रहेको संवाद जुरी मेम्बरलाई भने कमजोर लागेछ ।” बस्नेतले भने– “त्यहि भएर हाम्रो फिल्मका निर्माताद्धय नरेन्द्र महर्जन र माधव वाग्लेले कार्यक्रममा समेत सहभागिता जनाउनुभएन ।”

भलै, लुट फिल्मले उत्कृष्ट नवनिर्देशक, सिनेम्याटोग्राफर, उत्कृष्ट अभिनेता लगाएतका शिर्षकमा भने अवार्ड प्राप्त गर्न सफल रह्यो । आफुले उत्कृष्ट नवनिर्देशकको अवार्ड पाएपनि फिल्ममा रहेको सबैभन्दा सशक्त हतियार संवादमा अवार्ड नपाउँदा आफ्नो कामलाई निरुत्साहित बनाएको उनले गुनासो पोखे । यद्यपी आफ्नो सफलता फिल्मका सबै क्रु मेम्बरहरुको रहेको बताउँदै बस्नेतले आगामी दिनमा पनि नेपाली फिल्म उद्योगलाई अझै राम्रा र सफल फिल्म दिईरहने बताए ।

अवार्ड कार्यक्रममा संवाद शिर्षक अर्न्तगत उत्कृष्ट संवादको अवार्ड विजय बस्नेत निर्देशित फिल्म देवयानीले प्राप्त गरेको थियो । जुरी मेम्बरहरुले देवयानीको संवादलाई उत्कृष्ट माने । निश्चल जी आफ्नो चिज सबैलाई राम्रो लाग्छ र लाग्नु पनि पर्छ । तर, आफ्नो मात्रै राम्रो देख्ने र अरुको चाँहि नराम्रो नै देख्ने बानी राम्रो हो र ?

Category: Gossip