अन्ततः मनिषले पत्याए अरुणिमालाई
सायद आफूलाई सुहाउँदो भूमिका कसैसँग पनि नभएर होला, प्रस्ताव नआएको अरुणिमाले केही समयअघि अनलाईनखबरसँग कुरा गर्दै भनेकी थिइन् । तर, अहिले एक निर्देशकले भने अरुणिमालाई पत्याएका छन् । यसअघि ‘जिन्दगानी दर्पणछाया’को निर्देशन गरेका मनिष पन्थले अरुणिमालाई पत्याएका हुन् । उनले नायिका लम्साललाई छायांकन भइरहेको चलचित्र ‘उर्वशी’मा अभिनय गराएका छन् ।
बुटवलमा छायांकन भइरहेको यो चलचित्रमा अरुणिमा एक ‘लभर गर्ल’को भूमिकामा देखिँदैछिन् । नायिका लम्सालको सिनेमाभित्र छोटो तर महत्वपूर्ण भूमिका छ । चलचित्रमा लम्सालसँगै नायिका नीता ढुंगानाको पनि अभिनय रहेको छ । खगेश्वर पुनको निर्माणमा तयार हुँदै गरेको यो चलचित्रमा किशोर खतिवडा, किशोर श्रेष्ठको पनि अभिनय रहेको छ । सिनेमाको प्रदर्शन नयाँ बर्षमा गर्ने निर्माण पक्षको भनाइ छ ।
‘उर्वशी’ ले नायिका लम्साललाई खुशी बनाउँछ या दुखी यो भने सिनेमाको प्रदर्शन पश्चात् नै थाहा हुनेछ ।