बिद्युत चुहावटबाट इलाममा वर्षको ३ करोड ५४ लाख घाटा
इलाम, माघ ८ - इलाममा बिद्युत चुहावटबाट नेपाल बिद्युत प्राधिकरणलाई बर्षेनी करोडौं रुपैयाँ घाटा हुने गरेको छ ।
एकै फिडरबाट बितरण गर्दै आएको प्रशारण लाइन अन्तर्गत इलाम र सिमावर्ती पाँचथरका बिभिन्न गाविसमा अबैध रुपले लाइन चोरी हुने गरेकाले ठूलो घाटा व्यहोर्नु परेको प्राधिकरणको इलाम शाखाले जनाएको हो ।
उसले २८ प्रतिशत बिद्युत चुहावट हुने गरेको बताएको छ । जसबाट प्राधिकरणलाई बार्षिक तीन करोड ५४ लाख ५२ हजार चारसय ४० रुपैंयाँ घाटा हुने गरेको जनाइएको छ ।
इलाममा मासिक १७ लाख ६४ हजार तीनसय ९५ युनिट बिद्युत आपूर्ती हुने भए पनि उपभोक्ताले १२ लाख ७२ हजार युनिटको मात्रै महसुल बुझाएर बिद्युत उपभोग गर्ने गरेको शाखाको भनाइ छ ।
प्रशारण लाइनको एकै फिडर अन्तर्गत सिमावर्ती पाँथचरको फाक्तेप, चिलिङदेन र इलामको पुवामझुवा, चमैता र फाकफोक गाविसमा मात्रै चार लाख ९२ हजार तीनसय ९५ युनिट बिद्युत चुहावट हुने गरेको प्राधिकरणका इलाम केन्द्र प्रमुख राजीवकुमार शर्माले बताउनुभयो । यसमध्ये केही प्रतिशत भने प्राबिधिक त्रुटीले चुहावट हुने उहाँको भनाइ छ ।
जिल्लाका बिद्युत बिस्तारित सबै क्षेत्रमा चुहावट सम्बन्धी अध्ययन भइरहेको प्राधिकरणले जनाएको छ । बिद्युत चोरी गर्नेको पहिचान गरी बिस्तारित लाइनै कटाएर कार्बाही गर्न थालेपछि भने मिटर जडान गर्ने गराउनेको संख्या ह्वात्तै बढेको प्राधिकरण इलाम शाखाले छ ।
Category: समाचार
