मंगलग्रहमा खोल्सा रहेको हुन सक्ने संकेत: खाल्डा र पानीको अवस्था तथा जीव बाँच्न सक्ने सम्भावनाको खोजी जारी

नासाको मार्स रोभर क्युरोसिटीले मंगलग्रहमा खोल्सा रहेको हुन सक्ने संकेत देखिएको भन्दै यसबारे अध्ययन गर्ने जनाएको छ । यसअघि क्युरोसिटीले नासालाई पहिलो पटक मंगलग्रहमा चट्टानको स्पर्श गरेको जानकारी गराएको थियो । रोभर आफ्नो स्वचालित पाखुराले सो चट्टानलाई स्पर्श गदै आफनो गन्तब्यतर्फ अघि बढिरहेको जानकारी गराएको थियो ।
क्युरोसिटीले विगत केही समयदेखि एउटा अनौठो पिरामिड आकारको चट्टान ज्याक म्याटिजिभिकको अनुसन्धान गरेको थियो । करिव सात फिट लामो स्वचालित पाखुराको सहगोगमा रोभरले चट्टानका केही भागहरुको अवलोकन गरेको वताइएको छ । रोभरले अल्फा पार्टिकल एक्स रे स्पेक्ट्रोमिटरको सहायताले चट्टानको तत्वको बनोटबारे अध्ययन गरेको थियो ।
 रोभरले पठाएको तस्वीरमा रोभरका स्वचालित पाखुरा ज्याक म्याटिजिभिक तर्फ घिस्रेको देखाइएको छ । मार्स रोभरलाई अमेरिकी अन्तरिक्ष एजेन्सी नासाले मंगलग्रहमा पठाएका थियो ।
 मार्स रोभर मंगल ग्रहमा कम्तीमा दुई बर्षसम्म सक्रिय रहने जनाइएको छ । दुई वर्षे अवधीमा मार्स रोभरले मंगलग्रहमा रहेका खाल्डा र पानीको अवस्था तथा जीव बाँच्न सक्ने सम्भावनाको खोजी गर्ने वताइएको छ ।

- --एजेन्सी