ट्वीटरमा प्रधानमन्त्रीले लेखे, ‘लोडसेडिङ घटाउन भारतबाट बिजुली’

८ माघ, काठमाडौं । पहिलोपटक ट्वीटर चलाएका प्रधानमन्त्री डा. बाबुराम भट्टराईले आइतबार एकदिनमा ६ पटक ट्वीट गर्न भ्याउनुभएको छ । जसमा प्रधानमन्त्रीले आलोचकबाट आफूलाई प्रतिरक्षा गर्नुका साथै लोडसेडिङ न्यूनीकरण गर्न भारतबाट बिजुली ल्याउने कोशिस भैरहेको जानकारी दिनुभएको छ ।

आफ्नो नयाँ ट्वीटरमा ट्वीट गर्दै प्रधानमन्त्री भट्टराईले भन्नुभएको छ, ‘हामी लोडसेडिङ न्यूनीकरण गर्न प्रयत्नशील छौं । इतिहासले थुपारेको फोहोर सोहोर्न समय लाग्दोरहेछ । भारतबाट थप ७० मे.वा. बिजुली ल्याउने कोशिस भैरहेको छ ।’ लोडसेडिङसम्बन्धी प्रधानमन्त्रीको ट्वीटबारे बालुवाटार स्रोतसँग जिज्ञासा राख्दा प्रधानमन्त्रीले भारतीयहरुको उच्च तहमा सम्पर्क गरेर विद्युत उपलब्ध गराउन आग्रह गरेको र केही दिनमै ७० मेघावाट विद्युत नेपालले पाउने र लोडसेडिङ केही कम हुने स्रोतले दाबी गर्यो ।

प्रधानमन्त्रीद्वारा लालध्वजका नाममा आइतबार ट्वीटर अकाउन्ट खोलिएपछि आएका प्रतिक्रियाहरुलाई जवाफ दिँदै ट्वीटरमा लेखिएको छ- ‘युद्धको मर्म बुझेकाले मात्र शन्ति दिन सक्छ । सम्राट अशोक सबभन्दा ठूला शान्ति दूत बनेका थिए । त्यसैले लाध्वजबाट आशंकित नबनौं ।’आलोचकहरुसँग प्रधानमन्त्रीको आग्रह छ, ‘साथीहरु वास्तविक नेता आलोचनादेखि डराउँदैन, म रचनात्मक आलोचनालाई स्वागत गर्छु । तर, कृपया आधारहीन बदनामी नगरिदिनुहोला ।’

यसैगरी प्रधानमन्त्री भट्टराईले ट्वीट गर्नु भएको छ- ‘द्वन्द्वकालका मुद्दाहरु संक्रमणकालीन न्यायका आधारमा निम्ट्याइनुपर्छ, परम्परागत फौजदारी न्यायप्रणालीको संयन्त्रमार्फत् होइन ।’